ՀՀ Մշտական ներկայացուցիչ Անդրանիկ Հովհաննիսյանի ելույթը ՄԱԿ-ի Մարդու իրավունքների խորհրդում

07 մարտի, 2023

52-րդ նստաշրջան, օրակարգի երկրորդ կետ, ընդհանուր քննարկում

07 մարտի, 2023թ.

Պարոն նախագահող,

Հայաստանը մեծապես գնահատում է մի շարք պատվիրակությունների կողմից Լաչինի միջանցքի արգելափակման խնդրի բարձրացումը: Լաչինի միջանցքը միակ ճանապարհն է, որը կապում է Լեռնային Ղարաբաղն արտաքին աշխարհի հետ: Արդեն շուրջ երեք ամիս է Ադրբեջանն այն արգելափակում է: The Freedom House-ը զգուշացնում է, որ հումանիտար ճգնաժամը մոտալուտ է: Իրավիճակը, սակայն, կարող է վերածվել հումանիտար արհավիրքի, քանի որ արդեն զգացվում է առաջին անհրաժեշտության ապրանքների, սննդի և բուժմիջոցների սուր պակասը: Միևնույն ժամանակ, Ադրբեջանը շարունակում է ռազմական սադրանքներ իրականացնել: Երկու օր առաջ այն դիվերոսիոն հարձակում է իրականացրել Լեռնային Ղարաբաղի տարածքում՝ դարանակալելով ու սպանելով երեք հայ ոստիկան:

Ադրբեջանը շարունակում կոպիտ խախտումներ և սադրանքներ իրականացնել՝ բացահայտորեն արհամարհելով միջազգային բազում կոչերը հարգելու Լեռնային Ղարաբաղի հայերի իրավունքները: Մասնավորապես, Ադրբեջանը հրաժարվում է կատարել Արդարադատության միջազգային դատարանի որոշումը, ըստ որի այն պարտավոր է ապահովել անխոչընդոտ տեղաշարժը Լաչինի միջանցքի ամբողջ երկայնքով: Այս առնչությամբ ՄԱԿ-ի Գլխավոր քարտուղարը հայտարարել էր, որ Արդարադատության միջազգային դատարանի դատավճիռները ենթակա են պարտադիր կատարման:

Մեկ շաբաթ առաջ, հենց այս Խորհուրդի նիստի շրջանակներում ՄԱԿ-ի Գլխավոր քարտուղարը շեշտեց, որ «մարդու իրավունքների հանդեպ հանրային արհամարհանքը և թաքնված քամահրանքը պետք է ահազանգ դառնան», և որ «ժամանակն է կանգնել պատմության ճշմարիտ կողմում», նաև որ «յուրաքանչյուր մարդու իրավունքները պետք է պաշտպանված լինեն, ամենուրեք»:

Եկել է ժամանակը պաշտպան կանգնելու Լեռնային Ղարաբաղի ժողովրդի իրավունքներին:

Շնորհակալություն:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր