ՄԱԿ ժնևյան կառույցներում և այլ միջազգային կազմակերպություններում ՀՀ մշտական ներկայացուցիչ Անդրանիկ Հովհաննիսյանի հարցազրույցը ՄԱԿ-ի ժնևյան գրադարանի և արխիվների «Next Page Podcast» հաղորդման շրջանակներում

14 ապրիլի, 2022

Ս․թ․ ապրիլի 14-ին ՄԱԿ-ի ժնևյան գրադարանի և արխիվների «Next Page Podcast» հաղորդման շրջանակներում հրապարակվել է ՄԱԿ ժնևյան կառույցներում և այլ միջազգային կազմակերպություններում ՀՀ մշտական ներկայացուցիչ Անդրանիկ Հովհաննիսյանի հարցազրույցը։ Հարցազրույցը վարում էր Ժնևում ՄԱԿ-ի գրադարանի և արխիվի տնօրեն Ֆրանչեսկո Պիզանոն։ «Next Page Podcast»-ը հաղորդումների շարք է, որոնց շրջանակներում զրուցակիցները մտքեր են փոխանակում բազմակողմ դիվանագիտության մասին, անդրադառնում են մարտահրավերներին, որոնց այն բախվում է, ինչպես նաև հնարավորություններին, որ այն ներկայացնում է արդի դինամիկ և փոփոխական աշխարհակարգում։

Հաղորդման ընթացքում Ա․Հովհաննիսյանն անդրադարձել է բազմակողմ դիվանագիտության ձևավորման պատմական մի շարք նշանակալի իրադարձությունների՝ 1814թ․-ի Վիեննայի համաժողովից (Concert of Europe) մինչև մեր օրերը։ Նա խոսել է արդի միջազգային հարաբերությունների ու դրանցում բազմակողմ դիվանագիտության խաղացած դերի մասին։

Հաշվի առնելով, որ այս տարի լրացել է ՄԱԿ-ին Հայաստանի անդամակցության 30-ամյակը՝ Ա.Հովհաննիսյանը ներկայացրել է ՀՀ փոխգործակցությունը Միավորված ազգերի կազմակերպության շրջանակներում։ Նա նշել է, որ անդամակցությունից ի վեր Հայաստանը մշտապես ձգտել է իր ներդրումն ունենալ ՄԱԿ գործունեության մեջ՝ ակտիվորեն ներգրավված լինելով ՄԱԿ տարբեր մարմինների և կոմիտեների աշխատանքներում, նախագահելով և աշխատելով տարբեր բյուրոներում և խորհուրդներում, մասնակցելով խաղաղապահ առաքելություններին։

Ա.Հովհաննիսյանն անդրադարձել է Հայաստանի բազմադարյա պատմությանը՝ առանձնացնելով հայ ժողովրդի պատմության նշանակալի հանգրվանները։ Նա զուգահեռներ է անցկացրել բազմակողմ դիվանագիտության գլոբալ նշանակություն ունեցող իրադարձությունների ու Հայաստանի վրա դրանց ազդեցության շուրջ։ Ա. Հովհաննիսյանը ներկայացրել է Լեռնային Ղարաբաղի հակամարտության պատմական, քաղաքական ու իրավական հիմքերը և անդրադարձ է կատարել Հայոց ցեղասպանությանն ու հայկական սփյուռքի ձևավորմանը։

Հարցազրույցը ձայնագրվել է 2021թ.-ի դեկտեմբերին։ Այն հասանելի է հետևյալ հղումով. https://unitednationslibrarygeneva.podbean.com/e/ambassador-andranik-hovhannisyan-on-armenia-the-un-and-multilateralism/?fbclid=IwAR0KePQkDpKoh-oazva39S8MNBXhtoJhTIH6WUtJeNU3J3PolehvzTc0_3M

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր