Դեսպան Հասմիկ Տոլմաջյանը ելույթով հանդես եկավ «Գիտություն-քաղաքականություն փոխկապակցվածության ամրապնդումը եռակի մոլորակային ճգնաժամի հաղթահարման համար» խորագրով միջոցառմանը

17 դեկտեմբերի, 2025

Դեկտեմբերի 17-ին, Ժնևում ՄԱԿ-ի գրասենյակում և այլ միջազգային կազմակերպություններում ՀՀ մշտական ներկայացուցիչ, դեսպան Հասմիկ Տոլմաջյանը ելույթով հանդես եկավ Շրջակա միջավայրի ժնևյան ցանցի և Շվեյցարիայի կողմից կազմակերպված «Գիտություն-քաղաքականություն փոխկապակցվածության ամրապնդումը եռակի մոլորակային ճգնաժամի հաղթահարման համար» խորագրով միջոցառմանը։

Ելույթում դեսպանը շեշտեց գիտություն-քաղաքականություն փոխկապակցվածության առանցքային դերը մոլորակային եռակի ճգնաժամի՝ կլիմայի փոփոխության, կենսաբազմազանության կորստի, աղտոտման հաղթահարման գործում՝ ընդգծելով գիտահենք որոշումների կարևորությունը ճգնաժամի հասցեագրման ուղղությամբ համահունչ և արդյունավետ միջազգային համագործակցության ապահովման համար։ Դեսպանը կարևորեց նաև սիներգիայի խթանումը տարբեր միջկառավարական գիտա-քաղաքական հարթակների միջև՝ բարձր գնահատելով Կենսաբազմազանության և էկոհամակարգային ծառայությունների միջկառավարական գիտա-քաղաքական հարթակի (IPBES) դերը գիտության և քաղաքականության միջև կամուրջ կառուցելու գործում։ Դեսպանն ընդգծեց, որ 2026թ․ Երևանում կայանալիք COP17-ում IPBES-ի եզրակացությունները առանցքային նշանակություն կունենան Կունմին-Մոնրեալի կենսաբազմազանության գլոբալ շրջանակով սահմանված կենսաբազմազանության պահպանման, վերականգնման և կայուն օգտագործման նպատակների իրականացման առաջընթացի առաջին գլոբալ վերանայման, ինչպես նաև մինչև 2030 և 2050թթ. թիրախներին հասնելու արդյունավետ ուղիների ձևակերպման համար։

Եզրափակելով՝ դեսպանը մասնակիցներին հրավիրեց հաջորդ տարվա հոկտեմբերին Հայաստան՝ միասին վերահաստատելու գիտության կենտրոնական դերը կենսաբազմազանության կորստի կանխման, կլիմայական մարտահրավերների հաղթահարման և աղտոտման վերացմանն ուղղված համատեղ ջանքերում՝ ի նպաստ մեր մոլորակի և գալիք սերունդների բարեկեցության։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր