Շվեյցարիայում ՀՀ Դեսպան Անդրանիկ Հովհաննիսյանի դասախոսությունը Ժնևի համալսարանում

05 մարտի, 2024

Ս․թ․ մարտի 5-ին Շվեյցարիայում ՀՀ դեսպան Անդրանիկ Հովհաննիսյանը Ժնևի համալսարանում հանդես եկավ դասախոսությամբ, որը նվիրված էր Հայաստանի և Ադրբեջանի միջև բանակցությունների գործընթացին։ Դասախոսությունն անցկացվում էր «Համաշխարհային կառավարում․ բանակցությունների արվեստ և գիտություն» սեմինարի շրջանակում՝ Ժնևի համալսարանի, Երևանի պետական համալսարանի և Ցյուրիխի տեխնոլոգիական համալսարանի համագործակցությամբ։ 2024 թ․-ի ակադեմիական տարվա հետազոտության համար ընտրվել է Հայաստանի և Ադրբեջանի միջև հարաբերությունների թեման։ Ծրագրի ղեկավարը Շվեյցարիայի նախկին նախագահ և արտաքին գործերի նախարար Միշելին Կալմի-Ռեյն է:

Դեսպան Հովհաննիսյանը հանդես եկավ Հայաստանի մասին պատմական ու մշակութային ակնարկով, ներկայացրեց Լեռնային Ղարաբաղի հակամարտության սկզբնավորումը, դրա զարգացման փուլերը և բանակցային գործընթացը, Ադրբեջանի կողմից Լեռնային Ղարաբաղի հայաթափումը և մարդու իրավունքների ու մարդասիրական իրավունքի խախտումները։ Անդրադարձ կատարվեց Հայաստանի և Ադրբեջանի միջև ընթացող բանակցությունների գործընթացին, դրանցում Հայաստանի առաջնահերթություններին, «Խաղաղության խաչմերուկ» ծրագրին։ Ա.Հովհաննիսյանը ներկայացրեց Հայաստանի ձեռքբերումները ժողովրդավարության ամրապնդման ու տնտեսական զարգացման բնագավառներում։

Ա.Հովհաննիսյանը պատասխանեց ներկաների բազմաթիվ հարցերին։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր