Շվեյցարահայ համայնքայի բողոքի ցույցը Բեռնում

08 սեպտեմբերի, 2012

Ս.թ. սեպտեմբերի 8-ին Բեռնում տեղի ունեցավ շվեյցարահայ համայնքային կազմակերպությունների կողմից կազմակերպված բողոքի ակցիա` Հունգարիայի կողմից Ռամիլ Սաֆարովին Ադրբեջանին հանձնելու կապակցությամբ:

Բողոքի հանրահավաքը սկսվեց ժամը 13.00-ին` Բեռնում Հունգարիայի դեսպանության հարակից` Հելվեթիապլաց հրապարակում և տևեց մոտ 2 ժամ: Միջոցառման կազմակերպիչներն էին Շվեյցարիա-Հայաստան ընկերակցությունը, Շվեյցարահայերի միությունը, Օբերենթֆելդընի ընտանեկան և դպրոցական միությունը, Հայ օգնության միության շվեյցարական մասնաճյուղը և ՙՍևակ՚ միությունը:

Բողոքի ակցիային մասնակցում էին հայ համայնքի մոտ 100 ներկայացուցիչ` Շվեյցարիայի գրեթե բոլոր հայաշատ քաղաքներից` Ժնևից, Ցյուրիխից, Լոզանից, Նյուշատելից, Աարաուից, Լուգանոյից, շվեյցարական հասարակության ներկայացուցիչներ:

Ելույթ ունեցան Շվեյցարիայի խորհրդարանի ազգային խորհրդական, Շվեյցարիա-Հայաստան բարեկամության խորհրդարանական խմբի համանախագահ Ուելի Լոյենբերգերը, խմբի գլխավոր քարտուղար Սարկիս Շահինյանը, Շվեյցարիա-Հայաստան ընկերակցության համանախագահ Անդրեաս Դրայզիբները, համայնքի երիտասարդական կառույցների ներակայացուցիչ Միգանուշ Բաղրամյանը:

Ելույթ ունեցողները քննադատեցին Հունգարիայի իշխանությունների որոշումը, ինչպես նաև պահանջեցին շվեյցակական իշխանություններից հստակ դիրքորոշում արտահայտել Հունգարիայի և Ադրբեջանի իշխանությունների գործողությունների առնչությամբ:

Ելույթներից հետո պատվիրակություն ուղարկվեց Հունգարիայի դեսպանություն, որտեղ շվեյցարահայ համայնքի անունից բաց նամակ հանձնվեց դեսպանության գործերի հավատարմատարին:

Բաց նամակում նշվում է հայ համայնքի խորը հիասթափությունն ու մտահոգությունը` Հունգարիայի իշխանությունների որոշումից, դատապարտվում է Ադրբեջանի կողմից մարդասպանին ներում շնորհելու և հերոսացնելու քաղաքականությունը, ինչպես նաև պահանջում Հունգարիայի կառավարությունից` հրապարակայնորեն ճանաչելու գործած սխալը, դատապարտելու Ալիևի կողմից Սաֆարովին ներում շնորհելը և հետ կանչելու Բաքվում Հունգարիայի դեսպանին:

Միջոցառումը լուսաբանվել է շվեյցարական մամուլում:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր