ՀՀ Մշտական ներկայացուցիչ Անդրանիկ Հովհաննիսյանի ելույթը ՄԱԿ Մարդու իրավունքների խորհրդի օրակարգի չորրորդ կետի ներքո

22 մարտի, 2023

Պարոն նախագահող,

Հայաստանը հրավիրում է այս բարձր մարմնի ուշադրությունն այն ծանր իրավիճակին, որը ստեղծվել է Ադրբեջանի կողմից մարդու իրավունքների ոտնահարման հետևանքով: Եթե իրավիճակը շտկելու համար համապատասխան և անհրաժեշտ միջոցներ անհապաղ չձեռնարկվեն, այն կարող է վատթարանալ՝ հանգեցնելով զանգվածային ոճրագործությունների: Առկա են դրա մասին ազդարարող բոլոր նախանշանները:

Լաչինի միջանցքի արգելափակման հետևանքով, մարդու իրավունքների հետ կապված իրավիճակը Լեռնային Ղարաբաղում գնալով վատթարանում է, ինչի մասին ահազանգում են մի շարք հեղինակավոր միջազգային կազմակերպություններ, ինչպիսիք են Human Rights Watch-ը, Amnesty International-ը և Freedom House-ը:

Միևնույն ժամանակ, մի շարք միջազգային զեկույցներ՝ դրանց թվում Եվրոպայի Խորհրդի Խորհրդարանական Վեհաժողովի դիտորդները, հաստատում են Ադրբեջանի կողմից Հայաստանի ինքնիշխան տարածքների օկուպացիայի փաստը:

Ադրբեջանի հնչեցրած ռազմատենչ հռետորաբանությունը նոր ոտնձգություններ է պարունակում Հայաստանի տարածքային ամբողջականության և ինքնիշխանության հանդեպ: Ադրբեջանն ամենաբարձր մակարդակով հրապարակայնորեն հայտարարում է, որ Հայաստանի հետ խաղաղության ցանկացած պայմանագիր կկնքվի միայն իր՝ Ադրբեջանի պայմաններով: Միևնույն ժամանակ Ադրբեջանը մշտապես կրակոցներ է արձակում քաղաքացիական բնակչության ու ենթակառուցվածքների ուղղությամբ:

Միջազգային հանրության կոչերն ու մտահոգության արտահայտումներն Ադրբեջանի համար ոչ մի արժեք չունեն: Ադրբեջանը քամահրանքով է վերաբերվում նույնիսկ այն կոչերին, որոնք գալիս են ՄԱԿ-ի Գլխավոր քարտուղարից, Մարդու իրավունքների հարցերով Բարձր հանձնակատարից և Հատուկ ընթացակարգերի մանդատակիրներից:

Ավելին, Ադրբեջանը հրաժարվում է իրագործել Արդարադատության միջազգային դատարանի որոշումները, որոնք պարտադիր են կատարման համար։ Դրանք պահանջում են. ապահովել ազատ տեղաշարժը Լաչինի միջանցքի երկայնքով, ինչպես նաև պաշտպանել բռնություններից և մարմնական վնասվածքներից այն անձանց, որոնք գերեվարվել են Հակամարտության արդյունքում, կանխել հայերի դեմ ուղղված ռասիստական և խտրականություն բորբոքող ու հրահրող գործողությունները՝ ներառյալ պաշտոնյաների և հանրային հաստատությունների կողմից, կանխել հայկական մշակութային ժառանգության պղծումն ու վանդալիզմը և պատժի ենթարկել դրանք իրականացնողներին:

Մարդու իրավունքների այս կոպտագույն խախտումներին պետք է վերջ դրվի: Մենք համոզված ենք, որ ՄԱԿ-ի փաստահավաք առաքելության տեղակայումը կարող է դառնալ կանխարգելման կարևոր մեխանիզմ:

Եթե Ադրբեջանը մերժի այս նախաձեռնությանը, առավել հստակ ազդանշան կուղարկի, որ պատրաստվում է իրականացնել էլ ավելի մեծ ծավալի ոճրագործություններ:

Շնորհակալություն։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր